إلى كل شخص المفروض إن هو " راجل " عشان البطاقة بتقول كده .. عربة السيدات - ذات الملصق الأحمر - مكتوب عليها بالبنط العريض " للسيدات فقط " ..
عارفين عملوها ليه ؟؟!!!!
الموضوع بسيط هما عملوها عشان البنات تركبها في أي وقت من اليوم من غير ما حد يدايقها ...
و لو إنت شخص بينطبق عليك وصفك كـ " رجل " هتنآى بنفسك إنك تركب عربة السيدات أقلها حفاظاً على رجولتك و عشان ماتسمعش كلمة مالهاش لازمة من بنت - ده بما إننا في مجتمع شرقي و ماينفعش بنت تقول لراجل كلمة تدايقه عشان ده بيجرح كرامته - فحفاظاً على كرامتك بلاش تركب عربة السيدات ...
و ياريت كمان ماتبقاش راكب عربة السيدات و لما بنت تقولك " لو سمحت يا أستاذ دي عربة سيدات ".. ترد بكل وقاحة :.. " يعني أنا هبصلِك إنتِ " أو " هو أنا جيت جنبك " أو لو الوقت متأخر أو بدري أوي يقولها " و إنتِ إيه اللي مخليكِ بره البيت لحد دلوقتي " أو "ايه اللي منزلِك بدري كده " ..
يعني غلطان ومش مُعترف بغلطك وبتزود في الغلط كمان و كمان بترد بقلة ذوق وقلة احترام ...
أحب أقولك :.. دي حاجة ماتخصكش لإن إنت مش ولي أمري و إذا إنتَ شايف إن دي حاجة غلط فقبل ما تعترض على أخطاء الأشخاص تحاشى إنت الأخطاء و ما تركبش عربة السيدات و بعدين اتكلم و راعي إن حضرتك ماتعرفش ظروف الناس ايه ولو أنا نازلة بدري فأنا عندي دراسة و شغل ومصالح ممكن أحتاج أنزلها بدري زي ما إنت نازل بدري عشان مصالحك و لو أنا راجعة متأخر فـ إنت ماتعرفش أنا ايه الظروف اللي أخرتني فبطل تتطفل على حياتي و خليك في حالك ...
وياريت كمان لما يكون الشخص اللي راكب عربة السيدات من الجيش أو الشرطة و بنت تنبهُه إن دي عربة سيدات ..
ياريت بلاش يقولها : " إنتِ مش شايفه إنتِ بتكلمي مين ؟!! أنا جيش على فكرة يعني مش هدفع غرامة " ..
يا سلااااااااااام تصدق أنا كده اقتنعت .. يعني إنت غلطان و بتتمادى في غلطك اعتماداً على منصبك ...
هي بقت كل المشكلة مشكلة غرامة .. يعني ماينفعش نعمل الحاجة الصح عشان هي المفروض تتعمل .. لازم نعملها عشان مش نتأذي بس ...
على فكرة كلامي مش هيدايق و يوجع حد إلا إذا كان بينطبق عليه .. فياريت محدش يزعل و نتعود إن اللي يعمل حاجة يتحمل عواقبها ..
نعم " ان الله لا يغير ما بقوم حتى يغيروا ما بأنفسهم"
ردحذف