رسالة الى كل من يتحدث في السياسة ….

رسالة إلى كل من يتحدث في السياسة و ينتقض السياسين و أفعالهم و السياسة ليست مجال اختصاصه .. ولا يفكر مجرد التفكير في تطوير نفسه في مجال اختصاصه ....

 النهضة في مصر- ولا أتحدث نهائياً عن مشروع النهضة - ليست متوقفة على السياسة و الآراء السياسية ..

النهضة في مصر ستنشأ من العلم و الأخلاق و احترام الآخر و التغيير في النفس أولاً ...

فإذا ترك السياسة كل من ليس له شأن بها لأهلها و جعل شغله الشاغل أن  يكون الأفضل في اختصاصه و أن ينهض بوطنه من مكان هو لديه القدرة في النهوض به ...

كانت هذه هي الطريقة الامثل لاستغلال صوته و قلمه و جهده و ليترك السياسة لأهلها و لمن تكون السياسة اختصاصهم لينهضوا بها ....

عـصــــــــارة مــــخ .....

هو ليه في حاجات الناس شايفاها وحشة ؟؟!!!!!!!!!!!

-         ليه البومة  بتدعو للتشاؤم .. أصلاً شكلها حلو جداً ..

بالذات بومة " هاري بوتر  " ...

-         و ليه الخفافيـش وحشة .. دي كائنات دماغها عاليـة ..

ماتعرفش هي طيور و اللا ثدييــات ...

هي آه بتطير بس بتولد !!!!

و أكيد إحساس ممتع إنها واقفة بالمشقلب ..

تخيل نفسك رجلك فوق و دماغك تحت .. إحساس مختلف ...

-         أما بالنسبة للخنـافــس .. معنديش أي خلفية ليه الناس مابتحبهاش ....

دي حشرات تحفة جداً ...

شكلها بيعجبني و بيحـسسني بالبهجة ...

بالذات ذات اللون الأحمر المرقطة بالأسود ...

-         نيجي بقى للشيء المسمى بـ " الجعـــران  " .....

باختصار شديد ده بالنسبة لي مجرد خنفسه .. لونها أزرق أو أخضر أو أسود ....

و معنديش أي خلفية ليه لما الخنفسة يبقى لونها كده يبقى اسمها " جعــران " ....

-         الثعابيــــــــــــــــن ...

دي بقى شبه ناس كتيــــــــــــــر ..

سهل جداً تتسحب من تحتك و تأذيك من غير ما تنتبه إنها موجودة أساساُ ...

بس ده لا يمنع إن شكلها حلو برده ....

و ده كان نتاج تفكير مالوش أي علاقة بما سبق ذكره ...

دي كانت مجرد عصارة مخي :D

خنفوسي :)

الشعب المصري بيفتي بطبعه .. بيتفزلك بالفطرة ....

احنا شعب بنحب نقول و نثبت للعالم ان احنا فاهمين في كل حاجة ..

و الفرد المصري كفيل بانه يتكلم في اي موضوع ومش كده و بس .. ده مُصِر انه يقنعك ان كلامه كله صح وانه فاهم أكتر منك - حتى لو الكلام في مجال اختصاصك انت - ..

باختصار شديد " نحن نختلف عن الآخرين " ...

مثلاً ..

راقصة :... اسألها بترقصي ليه ؟؟!! ،،

 و بثقة شديدة : "العمل عبادة " ...

"عبادة " !!!!!!!! معلش يعني عبادة ايه دي .. العمل الشريف عبادة ماشي .. انما اللي انتِ بتعمليه ده قلة أدب و قلة حياء .. ده التعبير أو الوصف المناسب للعمل بتاعك ....

                    .....................................................................

بنت قلعت الحجاب :... ليه يا حبيبتي قلعتي الحجاب ؟؟!! ،،

و بنفس الثقة الشديدة : ربنا بيقول " و أما بنعمة ربك فحدث " و أنا شعري ناعم و حلو و طويل ودي نعمة و أنا بحدث بها ...

فعلاً .. طيب ثانية واحدة كده .. أنا بس عايزة أفهمك ان الحجاب أساساً فرض و ربنا بيقول كمان " و ليضربن بخمرهن على جيوبهن " ....

                ...........................................................................

وفي نقاش ساخن :..

أنا :.. المرتد يقتل ..

شخصية بتفتي - كالعادة - :.. مين قال كده لأ طبعاً غلط مفيش حاجة في الدين بتقول كده ..

أنا :.. الرسول صلى الله عليه و سلم قال " من بدل دينه فاقتلوه " ..

الشخصية :.. أكيد حديث موضوع و بعدين انتِ ايه عرفك أصلاً - بلهجة هجوم حادة - ...

أنا :.. أولاً انا درست شريعة ،، ثانياً الحديث ده أخرجه البخاري و صحيح ..

الشخصية :.. بس بس هو أي حد بيفتي و خلاص و بعدين ايه دارسة شريعة دي ،، ماتقولها يا شيخ ان هي غلط هو انت مش سلفي بردو

- للتوضيح : الشيخ زميلنا في الكلية و هو شيخ لأنه مربي ذقنه اما علمه بالدين ف الله أعلم  بالموضوع ده - ..

 يا ترى بقى الشخصية دي تفقه ايه في الدين و ايه مفهوم الشيخ و السلفي عندها وايه مدى ثقافتها و المعلومات اللي بتحتفظ بها في ذاكرتها ؟؟!! ...

                    ........................................................................

واحد صاحبنا :.. لما تكون صايم في رمضان و مسافر بالطائرة ماينفعش تفطر ..

 بس ربنا قال " فمن كان منكم مريضاً أو على سفرٍ فعدةٌ من أيامٍ أُخر " ...

صاحبنا :.. ده عشان زمان كان في مشقة في السفر بس حالياً السفر سهل ..

الرسول صلى الله عليه و سلم قال " إن الله يحب أن تؤتى رخصه كما يحب أن تؤتى عزائمه " ...

صاحبنا :.. لأ بردو ده كان زمان عشان مشقة السفر ...

فعلاً ... ده على أساس ان الدين و الشرائع بتتغير من زمان للوقت الحالي ..

                       ....................................................................

في أحد المحاضرات واحد صاحبنا أثبت الآتي " 1 == 2 " و ده طبعا ببعض العمليات الحسابية الخاطئة مليووووووووووووووووووون في المية ... - وكانت دي نكتة اليوم -

بعد المحاضرة ...

صاحبنا العبقري بيكلم صاحبنا اللي بيفتي ....

صاحبنا العبقري :.. أنا أثبت إن 1 = 2 ... - حالة من الضحك الجماعي على حبة تريقة -

صاحبنا اللي بيفتي :.. بتضحكوا على ايه ؟؟!! .. ما هما فعلاً من كام سنة كده أثبتوا إن 1 = 2 ...

و اللي أثبت كده أخد براءة اختراع على اثباته ...

صاحبنا العبقري :.. يا راااااااااااااااااااااااجل و لما 1 = 2 قرفونا من ابتدائي بيهم ليه ؟؟!!!! .. و ليه الاتنين موجودين لما ليهم معنى واحد ؟؟!!!!!!!!!!!!!!!!!!  ....

صاحبنا اللي بيفتي أصابه حالة من الصمت التام ....

وده طبعاً بيؤكد ان الشعب المصري بيفتي بطبعه .. بيتفزلك بالفطرة ....

أشخاص حياتي معهم أحلى :)

في ناس كده موجودة في حياتنا عشان تخليها أحلى ..

ناس الحياة من غيرها بلا لون أو طعم أو رائحة .. حياة بلا معنى ..

ناس بتهون علينا كل حاجة ..

مابتسمحش لحاجة تجرحنا ..

ولو وقعنا بتسندنا و تفضل جنبنا لحد ما نرجع نقف تاني ..

ناس الحياة في غيابهم عاجزة عن الحركة ..

أول الناس دي أهلي .. ربنا يخليهم ليا .. و يخليني ليه ..

و شوية أشخاص تانين .. المفروض إنهم أصحابي ..

بس في الواقع أنا عاجزة عن إيجاد وصف لهم .. لأنهم أكتر من اخواتي ..

  

أميرة محمد :.. صديقة الطفولة .. أختي اللي اتربيت معاها .. كنا مدمنين قعدة في المطبخ مش عارفة ليه :) .. اللي لما ما أسألش عليها تتصل تقولي يا ندلة و بعدين تكمل المكالمة عادي ..

"مش أنااااااااااااااااااااااااااا" فاكرة

منيرة :.. صديقة ابتدائي .. صديقتي الوفية .. لما موبايلي بيرن برقمها بحس قد ايه أنا فعلاً ندلة ..

وسام محمد :.. أختي و حبيبتي .. بارتاح و أنا بتكلم معاها أوي .. بحبها لما تعد تشتمني و هي بتنصحني .. بحب خوفها عليا .. واحشاني أوي و نفسي أشوفها :)

 أمنية مصطفى :.. شخصية مستحيل أنساها .. بحب ضحكتها أوي أسلوبها .. كلامها.. نصايحها .. واحشاني أوي . ابتسامتها دايماً كانت بتديني أمل :)

"Let Love Live Long :)"

آيات عادل :.. أختي و صاحبتي .. أكتر حد هون عليا سنتين الفيوم .. هي صحيح مجنونة و بمليون كلمة في الدقيقة بس أنا بحبها أوي و واحشاني أوي ... واحشني جنانها و ضحكها و فسحتنا المفضلة كل يوم .. اه صحيح نسيت ( قوة و ثقة و وقاحة و حقيقة واقعة و بلكونة و جزر )

خالد منير :.. أول شخص عرفته في الكلية .. الفنان .. اللي عذبته و احنا بنعمل مجلة الحائط اللي في الآخر ماتعلقتش .. صديقي اللي وقت ما احتاجه ألاقيه .. من أكتر الناس اللي بتشجعني :)

أحمد هاشم :.. الشخص اللي أول مرة عرفته فيها كان هيطرد من السيكشن بسببي .. (رب أخٍ لك لم تلده أمك ) أخويا :) .. صديقي الصدوق .. شخصية طيبة جداً و وفية جداً .. بتحب الخير للناس زي مابتحبه لنفسها أو أكتر شوية كمان .. حد نادر أوي تلاقي زيه .. وصعب تعرف حد تاني زيه .. بيخاف على زعلك أوي .. وبيحافظ على مشاعرك أوي .. و دايماً موجود جنبك :)

عمار ياسر :.. شخص ما كنتش بطيقه و كنت بكرهه جداً .. معرفش ازاي بقينا أصحاب ..صديق السفر .. أخويا اللي بيزعقلي لما أعمل حاجة هو شايفها غلط .. و كان بياخد مني البيبسي يرميه في الزبالة :( .. بنقفش من بعض أوقات على ولا حاجة و بعدين ننسى .. الشخص اللي لما ما اسألش عليه يتصل يزعق كتير و بعدين ولا كإن حاجة حصلت ..

رضوى عبد الفتاح :.. صاحبتي المجنونة .. أوقات بيجيلها هسهس في دماغها بيتهيألها حاجات غريبة و بيجيلها خزعبلات في دماغها .. بس أنا بحبها بالهسهس بتاعها .. صاحبة طيبة أوي و جدعة أوي .. "شوقنا أكتر شوقنا " ربنايخليهالي :)

سارة سمير :.. صحيح لسه عارفاها قريب .. بس بحسها قريبة مني أوي .. جدعة أوي .. عسل أوي .. و بحسها شبهي في حاجات كتير :) .. ربنا يديم صحبتنا :)

  

دي ناس أنا فعلاً مش عارفة حياتي من غيرهم هيبقى شكلها ايه ..

ربنا يديم بينا المعروف و يخليهم ليا و يديم صحبتنا و يجمعني بهم في جنة الخلد إن شاء الله J

رسالة - حياة أفضل -

كلنا بنحلم ..

بنحلم ببلدنا أحلى و أنظف و أرقى ..

بنحلم مانشوفش فيها محتاج نبصله بأسى و حزن و نقول ربنا يعينه و يساعده ..

و بنحلمله بحياة أفضل و أكرم ..

ماتيجوا كلنا نبقى وسيلة لحياة أفضل و أكرم للناس دي ..

و نحتسب الأجر و الثواب عند الله ..

رسالة - متعة العطاء -

احنا شباب زينا زيكم ...

بس أخدنا الخطوة الأولى في إننا نساعد ..

نساعد الناس و نساعد نفسنا ..

نساعد الناس .. بإننا نوفرلهم احتياجاتهم ..

و نساعد نفسنا .. بإننا نقضي وقتنا في الخير و نكسب أجر من الله و نشكره على نعمه ...

و باختصار .. نحس بمتعة العطاء ..

مستني ليه .. ماتضيعش لحظة في التفكير و خد قرار سريع ..

و حس بـ متعة العطاء .....

صورة وتعليق ...

تنويه :.. ما تحت العنوان لا يحتوي على أي صور  ... باختصار هو بعض النقد و العتب على بعض مُلتقطي الصور ...

الصورة الأولى :.. 

          " شاب يتحرش بفتاة "   

صورة أُلتُقطت في ظل الإنتشار الرهيب للتحرش في شوارع بلدنا العزيز .. للأسف ..

مُلتقِط الصورة .. وضعها على شبكة الانترنت و اعترض فيها على ما يحدث للفتاة و ندد بغياب النخوة و الرجولة و الدين ...

بغض النظر عن من هو السبب في حدوث هذا التحرش و بغض النظر عما ترتديه الفتاة في الصورة من رداء ساتر كان أو فاضح و بغض النظر عن دوافع و أهداف و عمر الشاب المتحرش .. ليس تجاهلاً .. و لكن ببساطة هذه ليست قضيتي حالياً ...

قضيتي هي مُلتقط الصورة ... ألم يستطع وضع كاميرته جانباً لمده دقيقة و يستخدم رجولته و نخوته ليدافع عن الفتاة .. أو ليقف في وجه عمل يتخالف مع الدين بما أنه تحدث باسم الدين ..

أما ان كانت ملتقطة الصورة فتاة ..فاعذريني .. لن أقبل عذرك بأنك فتاة و ليس بيدك حيلة لأنك ضعيفة و هذه هي الطريقة الوحيدة التي تجيدينها لحل المشكلة  ... أرفض هذا المبرر ببساطة لأني فتاة و أعرف تمام المعرفة أنكِ على أتم القدرة أن تباغتي ذاك المتحرش و تسقطيه أرضاً لأنه و ببساطة منشغل بشيء آخر .. ناهيكِ عن خوفه أساساً لأنه مذنب ..

الصورة الثانية :..

        " سحل و تعرية الفتاة 17-12-2011 "

صورة و فيديو أُلتقطوا في ظل أحداث الثورة لفتاة يتم سحلها و تعريتها من قبل رجال الجيش ..

بغض النظر عن أن الفتاة كانت ترتدي عباءتها على ملابس أخرى أو دونها .. و بغض النظر عن إن كان من سحلها جيش أو شرطة أو بلطجية لأن أحدهم لا يرتدي (بيادة) .. فهذه أيضاً ليست قضيتي ..

اللوم لا يقع هنا فقط على المصور .. بل على كل من وُجِد هناك و لم يقم بأي حركة للدفاع عن تلك الفتاة .. أو حتى تغطيتها .. ثم تحدث بعدها بمِلء فمِه أن ما حدث كان منافي للكرامة و الإنسانية ...

ولكن عذراً أيها المدافع عن الكرامة و الإنسانية :. لِم لم تستخدم كرامتك و إنسانيتك في رد كرامة و إنسانية تلك الفتاة ؟؟!!!!!..

الصورة الثالثة :..

       "  سيدة تُسرق حقيبة يدها بواسطة أياً من كان "

صورة أو فيديو أُلتقطوا في أي وقت من أوقات اليوم و في أي يوم من أيام السنة و من أي مكان في العالم لأحدهم سَرق حقيبة سيدة أو سيد و لاذ بالفرار .. ثم تحدث مُلتقط الصورة عن غياب الأمن و الأمانة ...

و بغض النظر عن أهداف السرقة و ظروف السارق ...

فهل عجِز المُصور عن الركض خلف السارق و إعادة ما سُرق .. و إن عجز عن الركض هل عجز أيضاً عن تحذير وتنبيه الناس بأن هذا سارق فاقبضوا عليه .. أم تتوقف مهاراته على الضغط على زر الكاميرا و الاستمتاع بما يرى من خلالها !!! ....

وبما أن الصور لا تنتهي عند هذا الحد... فقد كانت تلك الصور على سبيل المثال لا الحصر ....