صُحبَة غيـــــــــــــــر .. صُحبِة خيــــــــــــر .....

أصحاب .. أصحاب .. أصحاب .. أصحاب .. أصحاب .. أصحاب .. أصحــــــــــــــــــاب ...

كلنا عندنا أصحاب ....

أصحاب طفولة ..

أصحاب في المدرسة ..

أصحاب في الكلية ..

أصحاب في الشغل ..

أصحاب في المنطقة ....

و أصحاب بتيجي و تروح ....

و أصحاب طلعنا لقينا نفسنا أصحاب ....

في منهم أصحاب بجد معانا على طول و في منهم أصحاب عادي يعني و في منهم أصحاب بتجمعنا أي نوع من المصالح ....

صحيح ليا أصحاب قريبين جداً لا تجمعنا مصالح ..

بس في نوع أصحاب مختلف تماماً .. نوع غير .. ليه طعم تاني ...

الموضوع بدأ بأول قافلة داخلية طلعتها مع جمعية رسالة ....

رضوى :.. تسنيم أنا رايحة قافلة داخلية مع رسالة و قلت أقولك .. ها هتيجي معايا ...

أنا :... أكييييييييييييييييييد ...

رحت لقيت ناس كتير و في منهم ناس أعرفها .. معايا في الكلية .. بس معرفة سطحية ..أشكالهم .. أسماءهم .. صباح الخير .. صباح النور .... و شكـــــراً ...

بعد القافلة الناس دي تحولوا من زمايلي تجمعنا كلية واحدة لأصحابي .. بحبهم في الله ...

" إيمان فطين – تسنيم سليم " 

J

و نسيت الموضوع و ممكن نسيته لإن أنا عارفة الناس دي قبل كده .. أو مش نسيته بس ماحسيتوش أوي ...

بعد أكتر من سنة ....

أنا عضو في لجنة الميديا و الدعاية " رسالة قوافل داخلية المعادي " ..

إجتماع يوم الجمعة 5/5/2012  اتعرفت على ناس العلاقة الوحيدة اللي كانت بتجمعني بيهم إننا في لجنة واحدة و بنتواصل عن طريق الـ Face Book .... 

موبايلي بيرن يوم الأربعاء 9/5/2012 و كالعادة أنا هرد على أساس ان المتصل والدتي ...

فووجئت إن المتصل منار - منار كان أول تعامل معها تماماً يوم الاجتماع .. اتكلمنا في اليوم ده مع بعض بعيداً عن الشغل وقت قصير جداً .. يقدر من ربع لثلث ساعة -

منار ماكانتش متصلة عشان شغل ... لأ ..

منار كانت فاكرة ان الأسبوع ده امتحانات الميدترم بتاعتي و حبت تتطمن عليا عملت ايه مش أكتر و تسلم عليا بس ...

بعد ما قفلت مع منار كنت مبسوطة جداً و سعيدة إن هيكون ليا صاحبة زيها .. بتتطمن عليا بس عشان تتطمن عليا .. و كل ما يجمعنا سوياً فعل الخير لاأكثر و لا أقل ..

ساعتها حسيت بجد إن صُحبِة الخيــر.. صُحبة غيــــــر ...

غير في كل حاجة .. شكلها .. أهدافها .. كل حاجة ..

صُحبة ممتعة جداً .. بتحسس الواحد إن لسه في حاجة حلوة .. لسه في خير ..

صُحبة بتديني دفعة تفاؤل .. دفعة أمل .. إحساس بالسعادة اللا متناهية بدون أي سبب واضح غير إن دول صُحبِة خيــــــــــــر ...

صُحبة أفخر بها و أتمنى دوامها ... و أُنكِر معها أن دوام الحال من المحال ..

ربي أدِمها صُحبة خير .. ربي أدِمها نعمة ...