بلدنا أمان .. و شوارع نظيفة .. وناس محترمة .. و مفيش أطفال شوارع ولا ألفاظ بذيئة ع الفاضي و المليان ...
موظفين مش مرتشين و مش لازم أدفع شاي و قهوة و ما إلى ذلك عشان مصالحي تمشي و تخلص .. و ناس بتشتغل بضمير ...
ميبقاش في كمية الورق الفظيعة اللي بنملاها و كمية التوقيعات و الإمضاءات الأكتر و الروتين الممل عشان مصالحنا تخلص لدرجة إننا نزهق ...
أصحى في نص الليل مبسوطة عشان شفت حلم حلو ، مش مفزوع عشان شفت كابوس ...
يوم يعدي هادي وكله أخبار حلوة و مفيش دموع و محدش حزين ...
ناس بتضحك من قلبها عشان هي مبسوطة جداَ و عايزة تضحك ، مش بيضحكوا عشان " هم يضحك " .. أو عشان ينسوا إنهم " زعلانين " أصلاَ ...
أطفال بريئة ؛ عشان المفروض تكون بريئة ...
شمس تطلع في سماء صافية ؛ عشان تقول النهاردة أحلى من امبارح ، بس الشمس دي مابتحرقش ..
صاحب بجد وقت ما أحتاجله ألاقيه جنبي ، تحت أي ظروف و مهما عملت و زعلته يسامحني ؛ عشان عارف ان أنا زعلته غصب عني ....
شباب واقفين على ناصية الشارع بيدردشوا من غير شتايم و من غير ما يضايقوا حد ...
نقاش قوي في موضوع مهم بين أطراف متعارضة تعارض تام و ينتهي النقاش بـ " إختلاف الرأي لا يفسد للود قضية " و يبقى نقاش خالي من الألفاظ الخارجة ...
فيلم كوميدي عشان مضمونه و قصته يضحكوا ، مش عشان فيلم مليان سفاهة ...
شعب مصري مابيفتيش ، و لما يبقى مش عارف يقول " أنا مش عارف " ...
مدرسة بنروحها عشان نتعلم حاجة مفيدة مش عشان نتعلم ننط الصور ، و مدرسين بتشرح و بتعلم صح و مؤمنة إن " الأرزاق بيد الله " ...
ندخل الكلية اللي احنا عايزنها ، و أهلنا يكونوا راضيين عن اختيارنا - حتى لو كنت الأول على الجمهورية و قررت أدخل كلية غير كليات القمة - .....
ناس مؤمنة إن مش كل طلاب تجارة وحقوق دخلوها عشان فاشلين وماجابوش مجموع في الثانوية العامة ، و إن في كتير دخلوها عشان بيحبوا المجال ده و هيقدروا يكونوا حاجة فيه ....
دي مش كل الأحلام ..
بس كلها في النهاية أحلام قيد الإنتظار ...