احنا كشعب مصري " من أفضل و أكبر مروجي الإشاعات في العالم " و ممكن نُدخل جينيس في الموضوع ده ....
الموضوع بيبدأ في الأغلب من ولا حاجة ..أو حاجة صغيرة أوي ..
بس احنا كشعب مصري مابنعرفش ننقل الكلام زي ما هو ..
أو الحدث زي ما حصل لازم نحط ال "touch " بتاعنا و نحط شوية ملح و فلفل و كمون و بهارات كتيييييييييير ..أو " نِجَوِد " زي ما بيقولوا ...
و احنا بارعين في الموضوع ده ....
مش هطول عليكوا الموضوع متعلق بقصتين واحدة حصلت معايا و التانية مع أخويا .. ده غير قصص كتير أنا ماعشتهاش ...
القصة الأولى .. حصلت مع اخويا " عبد الله " ..
المكان : مكان قريب من الاوتوستراد ... الميكروباص مابيمشيش في المكان ده ...
الزمان : من حوالي سنة فاتت - تقريباً - ...
الأحداث :...
عبدالله راح يشتري حاجات و الناس لقت ميكروباص ماشي في المنطقة دي ...
واحد بيقول لصاحبه : " ايه ده هو الاوتوستراد واقف و مقفول و اللا ايه ؟؟!!! " ...
و بما إن صوتهم عالي ناس تانيين سمعوهم ...
و مع إن الولد كان بيسأل مجرد سؤال إلَّا إن الناس أخدوا السؤال على إنه حقيقة ...
و راحت و احدة قايله للي ماشية معاها :.. " الحقي دول قفلوا الأوتوستراد " ..
و الموضوع انتشر بسرعة مهولة إن الأوتوستراد مقفول - زي انتشار النار في القش- ...
و محدش حط في دماغه إن سواق الميكروباص ده كان ممكن يكون ساكن في المنطقة دي ... أو جاي يزور حد فيها... أو يعمل أي حاجة أو حصلت أي حاجة خلته ييجي غير إنه لقى الاوتوستراد مقفول ...
القصة الثانية .. حصلت معايا أنا شخصياَ ....
المكان : المترو ..
الزمان : 15-4-2012 ...
الأحداث :...
كالعادة زي كل يوم ركبت المتروالساعة 9 صباحاَ ..
بس على غير العادة المترو قرر يقف في محطة دار السلام ثلث ساعة ...
بدأنا رحلت الإشاعات من هنا ...
بعض الشخصيات في المترو :..." أصل عُمًّال المترو عاملين إضراب " ...
فعلاَ سابوا كل المحطات اللي قبل كده و قرروا يعملوا عند دار السلام بس !!!!!!!!!!!!!!!...
و الحمد لله المترو اتحرك قبل ما يحصل المزيد من الإشاعـــــــات ....
و اتضح الآتي :.. في مترو عطل بين دار السلام و الزهراء و فتحوا أبواب المترو والناس نزلت منه و مشيوا على القضبان و اتجاهين المترو بقوا ماشيين على قضيب واحد ..
وبالتالي مكانش ينفع المترو يتحرك غير لما المترو التاني يوصل المحطة ... - ده واقع ملموس أنا شفته - ...
الساعة 6:30 أنا في المترو ..
المترو بيقف في كل محطة في حدود 10 دقائق ..
الناس عندها حالة من الملل و الزهق و الاستفزاز لأنها هتتأخر عن مواعيدها و الجو حر و المترو ممل و زحمة ....
أحد الراكبات :... " هو المترو ماله بيعمل كده ليه الواحد كده هيوصل بكرة " ...
رد مباشر من راكبة أخرى :... "أصل في عربية وقعت من على الكوبري بتاع دار السلام على المترو و هو ماشي فالمترو واقف " ...
أنا :.... " لأ .. كل اللي حصل إن المترو عطل بين دار السلام و الزهراء .. فالإتجاهين ماشيين على نفس القضيب .. و مفيش عربيات وقعت على المترو " ....
هي :... " لأ موقعتش على المترو دي وقعت على القضيب " ....
أنا :.. " لأ مفيش حاجة وقعت أصلاَ و كمان المترو كان واقف بعيد عن الكوبري أصلاَ " ...
هي :.. " أنا شفت المترو بس بعد ماشالوا العربية ..." وبلهجة حادة جداَ و هجومية نوعاَ ما " و هو إنتِ كنتِ في المترو امتى أصلاَ " ..
أنا :... " الساعة 9 و ثلث " ...
هي :.. " طيب أصل أنا كنت في المترو الساعة 12 " ....
فترة من الزمن بعدين حد تاني سأل المترو واقف ليه ...
و حد تاني رد :.. " أصل في عمود نور وقع من برة المحطة على القضيب " ...
بعد فترة تانية ....
حد ثالث :.. " أصل الكهرباء ضربت في المترو و المترو ولَّع " ...
بس أنا قررت أسكت لإن اكتشفت ان الناس بتصدق الاشاعات أكتر مما تصدق الواقع ...
نفسي فعلاَ الناس تتيقن من كل حاجة بتتقالهم قبل مايرددوها و بلاش شغل البغبغانات ....
