مبدئيا "قالْك" دي كلمة أنا بستخدمها عشان أقول لشخص بيتكلم معايا إنت "كذْاب" بس بالطريقة يعني من غير ما أحرجو و أقولها صريحة ..
و عشان لو في حد حب يسأل اشمعنى "قالْك" أحب أقوله عشان احنا في عصر "أصل بيقولْك" , "أصل بيقولوا" , "أصلهم قالوا" , "قالْك بقى" و في النهاية بعد كل الكلام ال "بيقولْك عليه" بيطلع "كذب" أو "إشاعات" ده إذا كان في فرق بين الاتنين أصلاً ..
ايه بقى "قالْك مجاني" دي ؟؟!!!!!!!!!!!!
زي بالضبط "اشتري بيتزا و احصل على الثانية مجاناً " مع إنك مش واخدها مجاناً ولا حاجة لإن الإثنين هو مش متكلف فيهم نص الثمن الي إنت هتدفعوا ..
و زي كمان "اشتري أربع قطع و احصل على الخامسة مجاناً " أو "اشتري ثلاث علب بيبسي بسعر اثنين" ... إلخ ...........
بس أكتر حاجة بتنرفزني و تتعب مرارتي و بتحسسني فعلاً بـ "قالْك مجاني" هي :..
"التعليم المجاني"
يعني ايه تعليم مجاني و حط مليون خط تحت مجاني .. و بندفع مصاريف ؟؟!! لألأ عيب عليكي دي مصاريف رمزية ..
لا والله تصدقوا أنا كده اقتنعت !!!
و بما انه مجاني فإنت كمان بتدفع فلوس عشان يجددوا المدرسة و يجيبوا مراوح و دكك جديدة و مع كده المدرسة هي هي بنفس شكلها و مراوحها البايظة و دككها المكسرة من يوم ما أنشأت ....
الأكبر من "قالْك مجاني" في الموضوع ده "قالْك تعليم " .....
ليست هناك تعليقات:
إرسال تعليق